មើលស្តុករបស់អ្នក
ទំព័រ ស្តុក បង្ហាញរាយមុខទំនិញទាំងអស់ ព្រមទាំងចំនួនដែលអ្នកមានក្នុងដៃនៅពេលនេះ។ អ្នកអាចប្រើវាដើម្បីឆ្លើយតបពេលអតិថិជនទូរស័ព្ទមកសួរ មើលទំនិញណាដែលជិតអស់ ឬចុចបើកមើលប្រវត្តិរបស់ទំនិញណាមួយ។
មុនពេលចាប់ផ្ដើម
- អ្នកត្រូវមានសិទ្ធិ មើលទំនិញ។ ជួរឈរ ថ្លៃដើម បង្ហាញតែចំពោះអ្នកដែលមានសិទ្ធិ មើលថ្លៃដើមទំនិញ ប៉ុណ្ណោះ។
បើកទំព័រស្តុក
នៅលើម៉ឺនុយ សូមចុច ស្តុក (រូបកែវពង្រីកនៅផ្នែកខាងលើ)។

- វាយឈ្មោះ បាកូដ ម៉ាក ឬប្រភេទទំនិញនៅក្នុងប្រអប់ស្វែងរក ឬស្កេនបាកូដ ដើម្បីស្វែងរកទំនិញ។
ជួរនីមួយៗបង្ហាញថ្លៃដើមរបស់ទំនិញ តម្លៃលក់ (បង្ហាញជាចន្លោះតម្លៃ បើទំនិញមានតារាងតម្លៃច្រើន) និងចំនួនស្តុកជាក់ស្ដែងក្នុងដៃព្រមទាំងខ្នាតរបស់វា។ អត្ថន័យនៃតួលេខស្តុក៖
| អ្វីដែលអ្នកឃើញ | អត្ថន័យ |
|---|---|
| លេខពណ៌បៃតង | មានក្នុងស្តុក។ |
| លេខពណ៌បៃតង មានពាក្យ ស្តុកទាប នៅខាងក្រោម | ស្តុកបានធ្លាក់ដល់ ឬទាបជាងកម្រិត ការជូនដំណឹងស្តុកទាប របស់ទំនិញនោះ។ |
| 0 ឬលេខអវិជ្ជមាន | អស់ពីស្តុក។ លេខអវិជ្ជមានមានន័យថា អ្នកបានលក់លើសពីចំនួនដែលមានក្នុងស្តុក។ |
| សញ្ញាដាច់ (—) | មិនតាមដានស្តុក៖ ទំនិញនេះមិនរាប់ស្តុកទេ ដូចជាសេវាកម្មជាដើម។ |
អក្សរតូចៗនៅក្រោមលេខ អាចប្រាប់បន្ថែម៖
- បានកក់ទុក 3៖ ចំនួនដែលបានរក្សាទុកឱ្យអតិថិជនតាមការកក់ដែលនៅបើក។ ទំនិញទាំងនេះនៅតែមាននៅលើធ្នើរនៅឡើយ។ សូមមើល ការកក់ទុក។
- 20 នឹងមកដល់៖ ចំនួនក្នុងការបញ្ជាទិញពីអ្នកផ្គត់ផ្គង់ ដែលមិនទាន់ទទួលបាន។ បង្ហាញតែពេលបើក ទទួលការទិញចូលជាដំណាក់កាល ប៉ុណ្ណោះ។
- កំពុងកម្ម៉ង់ទិញ 2៖ ចំនួនដែលអតិថិជនបានទិញ ប៉ុន្តែហាងមិនទាន់មានទំនិញក្នុងដៃនៅឡើយ។ ពេលទំនិញចូល វានឹងត្រូវប្រគល់ជូនអតិថិជនទាំងនោះ។ សូមមើល ការលក់ដោយរង់ចាំស្តុក។
តម្រង និងតម្រៀប
- ចុច តម្រង។
- ជ្រើសរើសអ្វីដែលអ្នកត្រូវការ ឧទាហរណ៍ ស្តុក>ស្តុកទាប ដើម្បីមើលទំនិញដែលត្រូវកុម្ម៉ង់ទិញថែម ឬ តម្រៀបតាម>ស្តុកតិចបំផុត។
- ចុច អនុវត្ត។
តាមលំនាំដើម តម្រង ស្ថានភាពដំណើរការ បង្ហាញតែទំនិញដែលកំពុងដំណើរការ។ ជ្រើសរើស មិនដំណើរការ ដើម្បីស្វែងរកទំនិញដែលអ្នកបានបិទដំណើរការ។
ដើម្បីកំណត់ពេលដែលទំនិញត្រូវចាត់ទុកថាស្តុកទាប សូមកែសម្រួលទំនិញនោះ ហើយបំពេញ ការជូនដំណឹងស្តុកទាប។ សូមមើល កែសម្រួល ឬលុបទំនិញ។
មើលស្តុករបស់ទំនិញមួយ
ចុចលើទំនិញណាមួយ។ ផ្ទាំង ទិដ្ឋភាពទូទៅ បង្ហាញ ក្នុងស្តុក ថ្លៃដើមឯកតា និង តម្លៃស្តុក។ តម្លៃស្តុកនេះគឺ ចំនួនស្តុក × ថ្លៃដើមចុងក្រោយរបស់ទំនិញ ជាការប៉ាន់ស្មានរហ័ស ចំណែកផ្ទាំង ថ្លៃដើម នៅខាងក្រោម បង្ហាញថ្លៃដើមជាក់ស្ដែងដែលអ្នកបានចំណាយលើទំនិញក្នុងស្តុក។ ផ្ទាំង ស្តុក មាន៖
- ចលនាស្តុក៖ រាល់ការប្រែប្រួលទាំងអស់នៃស្តុកទំនិញនេះ។ សូមមើល ស្វែងរកមូលហេតុដែលស្តុកប្រែប្រួល។
- លេខស៊េរី៖ ទំនិញនីមួយៗតាមលេខស៊េរី សម្រាប់ទំនិញដែលតាមដានលេខស៊េរី និងចំនួនគ្រឿងក្នុងស្តុកដែលមានលេខស៊េរីហើយ។
- ថ្លៃដើម៖ ថ្លៃដែលអ្នកបានចំណាយលើទំនិញដែលនៅក្នុងស្តុក។ សូមមើល របៀបគណនាថ្លៃដើមស្តុក។
