សំណួរដែលគេសួរញឹកញាប់
ចម្លើយខ្លីៗចំពោះសំណួរដែលហាងថ្មីៗសួរច្រើនជាងគេ។ ចម្លើយនីមួយៗមានតំណទៅកាន់ទំព័រដែលពន្យល់ជំហានលម្អិត។
តើមនុស្សច្រើននាក់អាចប្រើក្នុងពេលតែមួយបានទេ?
បាន។ ម្នាក់ៗមានគណនីផ្ទាល់ខ្លួន ហើយអាចធ្វើការក្នុងពេលតែមួយ លើទូរស័ព្ទ ឬកុំព្យូទ័ររៀងៗខ្លួន។ អ្វីដែលម្នាក់រក្សាទុក នឹងបង្ហាញលើអេក្រង់អ្នកផ្សេងទៀតដែរ។ ម្ចាស់ហាង ឬអ្នកគ្រប់គ្រងជាអ្នកបន្ថែមបុគ្គលិក និងកំណត់ថាម្នាក់ៗអាចធ្វើអ្វីបាន នៅក្នុង ការកំណត់>អ្នកប្រើប្រាស់។ សូមមើល បន្ថែមក្រុមការងារ និងកំណត់សិទ្ធិ។
បើមនុស្សពីរនាក់កែការលក់តែមួយក្នុងពេលជាមួយគ្នា អ្នកដែលរក្សាទុកក្រោយគេនឹងឃើញសារ មានអ្នកផ្សេងបានកែប្រែការលក់នេះ។ សូមផ្ទុកឡើងវិញដើម្បីមើលការផ្លាស់ប្ដូរ។ សូមចុច ផ្ទុកឡើងវិញ ពិនិត្យមើលអ្វីដែលអ្នកនោះបានកែ រួចកែរបស់អ្នកម្ដងទៀត។
តើប្រើបានដោយគ្មានអ៊ីនធឺណិតទេ?
មិនបានទេ។ ទិន្នន័យហាងរបស់អ្នករក្សាទុកនៅលើម៉ាស៊ីនមេរបស់ Invoicery មិនមែននៅក្នុងទូរស័ព្ទទេ ដូច្នេះរាល់ទំព័រ និងរាល់ការរក្សាទុកត្រូវការអ៊ីនធឺណិត។ ពេលគ្មានអ៊ីនធឺណិត ទំព័រនឹងបង្ហាញ មិនអាចភ្ជាប់បានទេ ហើយពេលរក្សាទុក នឹងបង្ហាញ មានបញ្ហាភ្ជាប់បណ្ដាញ។ សូមពិនិត្យមើលការភ្ជាប់អ៊ីនធឺណិតរបស់អ្នក។ កម្មវិធីមិនទុកអ្វីសម្រាប់ផ្ញើពេលក្រោយទេ។
ពេលមានអ៊ីនធឺណិតវិញ សូមបើកបញ្ជីមើលថាការលក់ ឬការបង់ប្រាក់ចុងក្រោយរបស់អ្នកមានហើយឬនៅ មុននឹងបញ្ចូលម្ដងទៀត ដើម្បីកុំឱ្យកត់ត្រាជាន់គ្នាពីរដង។
តើប្រើទូរស័ព្ទ និងកុំព្យូទ័រជាមួយគ្នាបានទេ?
បាន ដោយប្រើគណនីតែមួយ៖ កម្មវិធីលើទូរស័ព្ទ និងកម្មវិធីរុករក (Browser) ណាមួយលើកុំព្យូទ័រ។ សូមមើល ដំឡើងកម្មវិធីលើទូរស័ព្ទ ឬកុំព្យូទ័រ។ ការកំណត់>ឧបករណ៍ បង្ហាញរាល់ទូរស័ព្ទ និងកុំព្យូទ័រដែលបានចូលគណនីរបស់អ្នក។
តើទិន្នន័យរបស់ខ្ញុំមានសុវត្ថិភាពទេ? អ្នកណាខ្លះអាចមើលឃើញ?
ហាងនីមួយៗមានមូលដ្ឋានទិន្នន័យ (Database) ផ្ទាល់ខ្លួន ដាច់ដោយឡែកពីហាងផ្សេងទៀត និងមានការចម្លងទុក (Backup) រៀងរាល់យប់។ នៅក្នុងហាងរបស់អ្នក ម្នាក់ៗមើលឃើញតែអ្វីដែលសិទ្ធិរបស់ខ្លួនអនុញ្ញាតប៉ុណ្ណោះ ហើយ ការកំណត់>កំណត់ហេតុសកម្មភាព បង្ហាញថាអ្នកណាបានធ្វើអ្វីខ្លះ។ សូមមើល មើលថាអ្នកណាបានធ្វើអ្វី។
តើខ្ញុំអាចយកទិន្នន័យចេញបានទេ?
បាន គ្រប់ពេល៖
- បញ្ជីណាមួយក៏អាចនាំចេញជា Excel បាន ដោយចុច ⋮ > នាំចេញជា Excel។ សូមមើល ស្វែងរក ត្រង និងនាំចេញបញ្ជី។
- ម្ចាស់ហាងអាចទាញយកច្បាប់ចម្លងនៃមូលដ្ឋានទិន្នន័យទាំងមូល នៅក្នុង ការកំណត់>ការបម្រុងទុកទិន្នន័យ។ សូមមើល បម្រុងទុកទិន្នន័យរបស់អ្នក។
តើប្រើម៉ាស៊ីនព្រីនប្រភេទណាបាន?
ម៉ាស៊ីនព្រីនណាក៏បាន ឱ្យតែទូរស័ព្ទ ឬកុំព្យូទ័ររបស់អ្នកអាចបញ្ជាឱ្យព្រីនបាន៖ ម៉ាស៊ីនព្រីនការិយាល័យសម្រាប់ក្រដាស A4 ឬ A5 ឬម៉ាស៊ីនព្រីនវិក្កយបត្រកម្ដៅ 80 mm ដែលបានដំឡើងលើកុំព្យូទ័រ។ ប៊ូតុង បោះពុម្ព បើកផ្ទាំងបោះពុម្ពរបស់ឧបករណ៍អ្នកផ្ទាល់។ អ្នកក៏អាចរក្សាទុកឯកសារជា PDF ឬជារូបភាព ហើយផ្ញើតាម Telegram បានដែរ។ សូមមើល បញ្ហាពេលបោះពុម្ព។
តើកម្មវិធីមានភាសាអ្វីខ្លះ?
ភាសាខ្មែរ និងអង់គ្លេស។ ម្នាក់ៗជ្រើសភាសារបស់ខ្លួននៅក្នុង ការកំណត់>ចំណូលចិត្តផ្ទាល់ខ្លួន>ភាសា សម្រាប់ទូរស័ព្ទ ឬកុំព្យូទ័រនោះ។
តើខ្ញុំអាចកែការលក់ដែលបានបង់ប្រាក់រួចបានទេ?
បាន ប្រសិនបើការលក់នោះមិនទាន់មានការបង្វិលទំនិញចូល៖ បើកការលក់ ហើយជ្រើស កែសម្រួល។ បើសរុបថ្មីតិចជាងប្រាក់ដែលអតិថិជនបានបង់ ការលក់នឹងបង្ហាញប្រាក់ដែលហាងត្រូវសងអតិថិជនវិញ។ ពេលការលក់មានការបង្វិលទំនិញចូលហើយ វាមិនអាចកែសម្រួលបានទៀតទេ។ សូមធ្វើការបង្វិលទំនិញចូលមួយទៀត ឬការលក់ថ្មីជំនួសវិញ។ សូមមើល កែ ឬលុបការលក់ និង ការបង្វិលទំនិញ និងការប្តូរទំនិញ។
ហេតុអ្វីខ្ញុំមិនអាចលុបបាន?
ព្រោះមានទិន្នន័យផ្សេងទៀតពឹងផ្អែកលើវា។ ការលក់ដែលមានការបង់ប្រាក់ ការទិញចូលដែលស្តុករបស់វាបានលក់ចេញហើយ ឬទំនិញដែលមាននៅក្នុងការលក់ បើលុបចោល នឹងធ្វើឱ្យរបាយការណ៍ និងស្តុករបស់អ្នកខុស។ កម្មវិធីនឹងប្រាប់អ្នកថាត្រូវលុបអ្វីជាមុនសិន។ ចំពោះទំនិញដែលអ្នកលែងលក់ អ្នកអាចបិទដំណើរការវាជំនួសវិញ៖ វានឹងលែងបង្ហាញក្នុងឯកសារថ្មី ប៉ុន្តែប្រវត្តិរបស់វានៅដដែល។ សូមមើល សារពេលកម្មវិធីបដិសេធ។
បើទូរស័ព្ទរបស់ខ្ញុំបាត់ ឬត្រូវគេលួច ត្រូវធ្វើយ៉ាងណា?
ចាកចេញពីទូរស័ព្ទនោះពីទូរស័ព្ទ ឬកុំព្យូទ័រផ្សេង៖ បើក ការកំណត់>ឧបករណ៍ ហើយចាកចេញពីទូរស័ព្ទដែលបាត់ ឬជ្រើស ចាកចេញពីឧបករណ៍ផ្សេងទៀតទាំងអស់។ បើអ្នកគ្មានឧបករណ៍ផ្សេង សូមប្រាប់ម្ចាស់ហាង ឬអ្នកគ្រប់គ្រង៖ នៅក្នុង ការកំណត់>អ្នកប្រើប្រាស់ គេបើកឈ្មោះរបស់អ្នក ហើយជ្រើស ចាកចេញពីគ្រប់ឧបករណ៍ទាំងអស់។ បន្ទាប់មក សូមប្ដូរពាក្យសម្ងាត់របស់អ្នក។ ដើម្បីកុំឱ្យអ្នកដទៃប្រើកម្មវិធីលើទូរស័ព្ទដែលទុកចោលនៅលើតុ សូមបើក ការកំណត់>ចាក់សោអេក្រង់។ សូមមើល គណនីរបស់អ្នក។