បន្ថែមអតិថិជន

គ្រាន់តែរក្សាទុកឈ្មោះអតិថិជនម្ដង រាល់ការលក់ សម្រង់តម្លៃ និងការទូទាត់ប្រាក់របស់គាត់ នឹងនៅប្រមូលផ្ដុំជាមួយគ្នា រួមទាំងចំនួនលុយដែលគាត់នៅជំពាក់ផងដែរ។ អតិថិជនទូទៅដែលដើរចូលមកទិញហើយបង់លុយភ្លាម មិនបាច់បង្កើតឈ្មោះដាច់ដោយឡែកទេ៖ អាចលក់ឱ្យអតិថិជន Walk-in បាន។

មុនពេលចាប់ផ្ដើម

  • អ្នកត្រូវមានសិទ្ធិ បង្កើតអតិថិជន ដើម្បីបន្ថែមអតិថិជន និង កែសម្រួលអតិថិជន ដើម្បីកែព័ត៌មានរបស់គាត់។

បន្ថែមអតិថិជន

  1. បើក ការលក់>អតិថិជន រួចចុច បន្ថែមអតិថិជន។
  2. បំពេញទម្រង់៖

    • ឈ្មោះ (ចាំបាច់) ឧទាហរណ៍ សុខ តារា ឬ ហាងទូរស័ព្ទ ស្រីមុំ។
    • ប្រភេទអតិថិជន (ចាំបាច់)។ កម្មវិធីជ្រើសប្រភេទលំនាំដើមឱ្យរួចស្រេច។ ប្រភេទនេះកំណត់តម្លៃដែលអតិថិជនទទួលបាន និងគំរូវិក្កយបត្រពេលបោះពុម្ពចេញ។ សូមមើល ប្រភេទអតិថិជន។
    • លេខទូរសព្ទ និង អាសយដ្ឋាន សម្រាប់ទាក់ទងគាត់។ ព័ត៌មានទាំងនេះក៏បោះពុម្ពលើរបាយការណ៍គណនីរបស់គាត់ដែរ។
    • លេខ VAT TIN សម្រាប់អាជីវកម្មដែលត្រូវការវិក្កយបត្រអាករ។ បង្ហាញតែពេលហាងរបស់អ្នកប្រើប្រព័ន្ធពន្ធប៉ុណ្ណោះ។
    • បុគ្គលិកលក់ បើហាងមានកម្រៃជើងសារ៖ ការលក់ថ្មីៗនឹងគិតជូនបុគ្គលិកម្នាក់នេះ។
    • កំណត់សម្គាល់ សម្រាប់កត់ត្រាព័ត៌មានផ្សេងៗដែលក្រុមការងារគួរដឹង។
    ទម្រង់បង្កើតអតិថិជនថ្មី ដែលបើកបញ្ជីប្រភេទអតិថិជន
  3. ចុច បង្កើត។

អ្នកក៏អាចបន្ថែមអតិថិជនដោយមិនបាច់ចាកចេញពីការលក់ ឬសម្រង់តម្លៃដែរ៖ ចុចបើកប្រអប់អតិថិជនក្នុងទម្រង់ រួចចុច បន្ថែមអតិថិជនថ្មី នៅខាងក្រោមបញ្ជី។ នៅលើ POS គ្មានប៊ូតុងនេះទេ ដូច្នេះបើជាអតិថិជនទិញនៅបញ្ជរ សូមបន្ថែមនៅទីនេះជាមុនសិន។

ជៀសវាងការបន្ថែមអតិថិជនដដែលពីរដង

ពេលកំពុងវាយឈ្មោះ ឬលេខទូរស័ព្ទ កម្មវិធីនឹងស្វែងរកមើលថាតើមានអតិថិជនស្រដៀងគ្នានេះឬនៅ។ បើមាន សញ្ញាព្រមានពណ៌ក្រហមនឹងបង្ហាញក្នុងប្រអប់ ហើយមានបញ្ជីមួយធ្លាក់ចុះនៅខាងក្រោម ឧទាហរណ៍ អាចមានអតិថិជនជាន់គ្នា (1)។ សូមពិនិត្យមើលបញ្ជីនោះ៖ បើមានអតិថិជននោះរួចហើយ សូមបិទទម្រង់នេះ ហើយរើសយកអតិថិជនដែលមានស្រាប់។ ទោះជាយ៉ាងណា ការព្រមាននេះមិនរារាំងការរក្សាទុកទេ ព្រោះមនុស្សពីរនាក់ផ្សេងគ្នាអាចមានឈ្មោះដូចគ្នាបាន។

ការព្រមានអំពីអតិថិជនជាន់គ្នា នៅក្រោមប្រអប់ឈ្មោះ

បើមានអតិថិជនដែលបង្កើតជាន់គ្នាពីរដងរួចហើយ អ្នកអាចបញ្ចូលគ្នាបាន។ សូមមើល លុប ឬបញ្ចូលអតិថិជនចូលគ្នា។

រៀបចំអតិថិជនទូទៅ (walk-in)

អ្នកទិញដែលមិនប្រាប់ឈ្មោះ ត្រូវលក់កាត់ឱ្យអតិថិជនតែមួយ ដែលជាទូទៅហៅថា Walk-in Customer។ នៅលើ POS រាល់ការលក់ចាប់ផ្ដើមជាមួយអតិថិជននេះស្រាប់ ដូច្នេះអ្នកគិតលុយមិនបាច់រើសឈ្មោះអតិថិជនទេ។

បើក្នុងបញ្ជីអតិថិជនមិនទាន់មានទេ សូមបង្កើតម្ដងទុកប្រើ៖

  1. ចុច បន្ថែមអតិថិជន។
  2. វាយ ឈ្មោះ ដោយដាក់ពាក្យ "walk-in" ក្នុងនោះ ឧទាហរណ៍ Walk-in Customer។
  3. ទុក ប្រភេទអតិថិជន នៅលើប្រភេទលំនាំដើម (មានសម្គាល់ពាក្យ លំនាំដើម ក្នុងបញ្ជី) រួចចុច បង្កើត។

POS នឹងរើសយកអតិថិជនក្នុងប្រភេទលំនាំដើមណាដែលមានពាក្យ "walk-in" ក្នុងឈ្មោះ។ បើគ្មានទេ វានឹងរើសយកអតិថិជនចាស់ជាងគេក្នុងប្រភេទនោះ ដែលអាចជាមនុស្សពិតប្រាកដ។ ដូច្នេះ សូមទុកអតិថិជន Walk-in នៅក្នុងប្រភេទលំនាំដើមជានិច្ច ហើយកុំលុបវាចោល។

រកអតិថិជន

ទំព័រ ការលក់>អតិថិជន បង្ហាញបញ្ជីអតិថិជនទាំងអស់ រួមជាមួយលេខទូរស័ព្ទ ប្រភេទ កាលបរិច្ឆេទលក់ចុងក្រោយ ការលក់សរុប និង សមតុល្យ (ចំនួនលុយដែលនៅជំពាក់)។ វាយក្នុងប្រអប់ ស្វែងរកឈ្មោះ លេខទូរស័ព្ទ ឬប្រភេទ... ដើម្បីស្វែងរកឱ្យចំ ឬចុចលើក្បាលជួរឈរដើម្បីតម្រៀប។ ចុចលើឈ្មោះអតិថិជនដើម្បីបើកទំព័រព័ត៌មានលម្អិត។ សូមមើល ទំព័ររបស់អតិថិជន។

កែព័ត៌មានអតិថិជន

បើកទំព័រអតិថិជននោះ រួចចុច កែសម្រួល ឬចុចលើសញ្ញា ⋮ នៅខាងចុងជួររបស់គាត់ ហើយរើស កែសម្រួល។ កែប្រែព័ត៌មានដែលចង់ប្ដូរ រួចចុច ធ្វើបច្ចុប្បន្នភាព។

ទំព័រពាក់ព័ន្ធ

នៅមានចម្ងល់មែនទេ?

ផ្ញើសារមកយើង ក្រុមការងារយើងនឹងជួយអ្នក។

ឆាតមកយើងតាម Telegram