សម្រង់តម្លៃ
សម្រង់តម្លៃ សម្រាប់បង្ហាញអតិថិជនថាទំនិញមានតម្លៃប៉ុន្មាន មុនពេលគាត់សម្រេចចិត្តទិញ។ ការចេញសម្រង់តម្លៃមិនប៉ះពាល់អ្វីទេ គឺមិនទាន់កាត់ស្តុក ហើយអតិថិជនក៏មិនទាន់ជំពាក់ប្រាក់ដែរ។ ពេលគាត់យល់ព្រមទិញ អ្នកអាចបម្លែងវាទៅជាការលក់ដោយចុចតែម្ដង ដោយរក្សាទំនិញ និងតម្លៃដដែល។
មុនពេលចាប់ផ្ដើម
- មុខងារសម្រង់តម្លៃបើកឱ្យប្រើស្រាប់ លើកលែងតែម្ចាស់ហាងបានបិទវានៅក្នុង ការកំណត់>មុខងារ>សម្រង់តម្លៃ។ សូមមើល មុខងារ។
- អ្នកត្រូវមានសិទ្ធិ បង្កើតសម្រង់តម្លៃ។ រីឯការបម្លែងសម្រង់តម្លៃទៅជាការលក់ ត្រូវការសិទ្ធិ កែសម្រួលសម្រង់តម្លៃ និង បង្កើតការលក់។
បង្កើតសម្រង់តម្លៃ
- បើក ការលក់>សម្រង់តម្លៃ ហើយចុច សម្រង់តម្លៃថ្មី។
- ជ្រើសរើស អតិថិជន រួចបន្ថែមទំនិញ និងបរិមាណ ដូចពេលបង្កើតការលក់ដែរ៖ សូមមើល បង្កើតការលក់។
- បើត្រូវការ៖ ជ្រើសរើស មានសុពលភាពត្រឹម ដែលជាថ្ងៃចុងក្រោយនៃសុពលភាពតម្លៃនេះ។ ទុកជា គ្មានថ្ងៃផុតកំណត់ បើតម្លៃនេះមិនកំណត់ថ្ងៃផុតកំណត់ទេ។
- បន្ថែមការបញ្ចុះតម្លៃ ឬកំណត់សម្គាល់បើត្រូវការ រួចចុច រក្សាទុក។
សម្រង់តម្លៃនឹងទទួលបានលេខសម្គាល់ ដូចជា QT-001053 ហើយបើកឡើងភ្លាម ដោយមានស្ថានភាព កំពុងបើក។

បោះពុម្ព ឬផ្ញើ
ចុច បោះពុម្ព នៅលើសម្រង់តម្លៃ។ នៅទំព័របោះពុម្ព អ្នកអាចបោះពុម្ពចេញ ឬប្រើប៊ូតុង នាំចេញ ដើម្បីរក្សាទុកជាឯកសារ PDF ឬជារូបភាពសម្រាប់ផ្ញើតាមឆាត៖ សូមមើល បោះពុម្ព ឬផ្ញើវិក្កយបត្រ។ ចំណែកលក្ខខណ្ឌដែលបោះពុម្ពនៅខាងក្រោមតារាងទំនិញ អាចកំណត់បាននៅក្នុង ការកំណត់>ការបោះពុម្ព៖ សូមមើល ការកំណត់ការបោះពុម្ព។
បម្លែងទៅជាការលក់
- បើកសម្រង់តម្លៃ ហើយចុច បម្លែងទៅជាការលក់។
- ទំព័រការលក់ថ្មីនឹងបើកឡើង ដោយមានអតិថិជន ជួរទំនិញ តម្លៃ ការបញ្ចុះតម្លៃ និងកំណត់សម្គាល់ពីសម្រង់តម្លៃនោះស្រាប់។ អ្នកអាចកែប្រែតាមអ្វីដែលអតិថិជនចង់ប្ដូរ។
- ចុច រក្សាទុក។
សម្រង់តម្លៃនឹងប្ដូរស្ថានភាពទៅជា បានបំប្លែង ហើយបង្ហាញលេខវិក្កយបត្រលក់ដែលទើបបង្កើតនោះ។ ទាល់តែដល់ពេលនេះ ទើបកម្មវិធីកាត់ទំនិញចេញពីស្តុក។ សម្រង់តម្លៃដែលបានបម្លែងរួច មិនអាចកែប្រែ ឬលុបបានទេ ប៉ុន្តែបើអ្នកលុបការលក់នោះវិញ សម្រង់តម្លៃនឹងត្រឡប់មកជា កំពុងបើក ឡើងវិញ។
ពេលអតិថិជនមិនយល់ព្រម
សូមចុច ⋮ > កំណត់ថាបានបដិសេធ។ សម្រង់តម្លៃនោះនឹងនៅក្នុងបញ្ជីដោយមានស្ថានភាព បានបដិសេធ។ បើចង់បើកវាមកវិញ សូមចុច ⋮ > បើកឡើងវិញ។ សម្រង់តម្លៃដែលបានបដិសេធក៏នៅតែអាចបម្លែងទៅជាការលក់បានដែរ។
បើផុតថ្ងៃ មានសុពលភាពត្រឹម ស្ថានភាពនឹងបង្ហាញពាក្យ "ផុតកំណត់" បន្ថែម តែក្រៅពីនេះគ្មានអ្វីប្រែប្រួលទេ គឺអ្នកនៅតែអាចបម្លែងវា ឬប្ដូរថ្ងៃផុតកំណត់បាន។
ម៉ឺនុយ ⋮ ផ្សេងទៀត
- កែសម្រួល សម្រាប់កែសម្រង់តម្លៃដែលកំពុងបើក ឬបានបដិសេធ។
- ចម្លងស្ទួន សម្រាប់បង្កើតសម្រង់តម្លៃថ្មីដោយយកជួរទំនិញដដែល សម្រាប់អតិថិជនផ្សេង ឬសម្រាប់ផ្ដល់តម្លៃថ្មី។
- កក់ស្តុកទុក នៅលើសម្រង់តម្លៃដែលកំពុងបើក សម្រាប់ទុកទំនិញឱ្យអតិថិជននេះ (ត្រូវមានមុខងារបន្ថែមការកក់ទុក)៖ សូមមើល ការកក់ទុក។
- លុប សម្រាប់លុបសម្រង់តម្លៃដែលមិនទាន់បានបម្លែង។