មើលថាអ្នកលក់បានប៉ុន្មាន
របាយការណ៍ទាំងបីនេះឆ្លើយតបនឹងសំណួរសំខាន់ៗចំនួនបី៖ តើយើងលក់បានប៉ុន្មាន (សង្ខេបការលក់), អ្នកណាខ្លះជាអ្នកទិញ (ការលក់តាមអតិថិជន) និងទំនិញអ្វីខ្លះដែលលក់ដាច់ (ការលក់តាមម៉ាក និងប្រភេទទំនិញ)។ របាយការណ៍ទាំងបីរាប់បញ្ចូលរាល់ការលក់ទាំងអស់ ទាំងវិក្កយបត្រធម្មតា និងការលក់នៅបញ្ជរ POS ដោយគិតតាមកាលបរិច្ឆេទលើវិក្កយបត្រ។
មុនពេលចាប់ផ្ដើម
- អ្នកត្រូវមានសិទ្ធិ មើលរបាយការណ៍ និង មើលការលក់។ ចំណែកការមើលប្រាក់ចំណេញ ថ្លៃដើម និងអត្រាចំណេញ ត្រូវការសិទ្ធិ មើលថ្លៃដើមទំនិញ បន្ថែម បើគ្មានសិទ្ធិនេះទេ ជួរឈរទាំងនោះនឹងមិនបង្ហាញឡើយ។
- របៀបបើករបាយការណ៍ និងជ្រើសរើសកំឡុងពេល៖ សូមមើល បើករបាយការណ៍។
របៀបគណនាតួលេខ
គោលការណ៍ទាំងនេះអនុវត្តដូចគ្នាក្នុងរបាយការណ៍ទាំងបី៖
- ការលក់ គឺទឹកប្រាក់សរុបលើវិក្កយបត្រក្រោយបញ្ចុះតម្លៃទាំងអស់ ដោយមិនគិតបញ្ចូល VAT ទេ។
- ការបង្វិលទំនិញចូល គឺការបង្វិលទំនិញដែលធ្វើឡើងក្នុងកំឡុងពេលនោះ ដោយមិនខ្វល់ថាការលក់ដើមធ្វើឡើងនៅថ្ងៃណាឡើយ។ ឧទាហរណ៍ ការបង្វិលទំនិញនៅថ្ងៃទី 2 ខែមីនា ពីការលក់ក្នុងខែកុម្ភៈ នឹងត្រូវកាត់ចេញពីខែមីនា។
- ការលក់សុទ្ធ គឺការលក់ ដកការបង្វិលទំនិញចូល។
- ទឹកប្រាក់ជំពាក់ គឺប្រាក់ដែលអតិថិជននៅជំពាក់ គិតត្រឹមថ្ងៃនេះ ដោយរាប់បញ្ចូលទាំង VAT។
- ការបង់ប្រាក់មិនធ្វើឱ្យប្រែប្រួលតួលេខលក់ទេ៖ វិក្កយបត្រដែលមិនទាន់ទូទាត់ប្រាក់ ក៏នៅតែរាប់បញ្ចូលពេញចំនួនតាមកាលបរិច្ឆេទវិក្កយបត្រដែរ។
សង្ខេបការលក់
បង្ហាញពីដំណើរការលក់របស់ហាងក្នុងកំឡុងពេលនោះ តាមថ្ងៃនីមួយៗ (ឬតាមខែនីមួយៗ សម្រាប់កំឡុងពេលវែងជាងពីរខែ)។

| ប្រអប់ | អ្វីដែលវារាប់ |
|---|---|
| ការលក់សុទ្ធ | ការលក់ ដកការបង្វិលទំនិញចូលក្នុងកំឡុងពេលនោះ |
| វិក្កយបត្រ | ចំនួនការលក់ដែលមានកាលបរិច្ឆេទក្នុងកំឡុងពេលនោះ |
| ប្រាក់ប្រមូលបាន | ប្រាក់បង់ និងប្រាក់កក់ដែលទទួលបានក្នុងកំឡុងពេលនោះ តាមថ្ងៃបង់ប្រាក់ លើវិក្កយបត្រណាក៏ដោយ ដកប្រាក់ដែលសងអតិថិជនវិញពេលបង្វិលទំនិញក្នុងកំឡុងពេលនោះ។ រួមទាំង VAT |
| ទឹកប្រាក់ជំពាក់ | ទឹកប្រាក់ដែលនៅជំពាក់ថ្ងៃនេះ លើវិក្កយបត្រដែលមានកាលបរិច្ឆេទក្នុងកំឡុងពេលនោះ |
| មធ្យមភាគក្នុងមួយការលក់ | ការលក់ ចែកនឹងចំនួនវិក្កយបត្រ |
| ការបង្វិលទំនិញចូល | ការបង្វិលទំនិញដែលមានកាលបរិច្ឆេទក្នុងកំឡុងពេលនោះ |
នៅខាងក្រោមក្រាហ្វ មានតារាង ទំនិញលក់ដាច់បំផុត និង អតិថិជនទិញច្រើនបំផុត ដែលតម្រៀបតាមចំនួនទឹកប្រាក់លក់។ ប្រអប់នៅខាងលើផ្នែកខាងឆ្វេងអាចជ្រើសរើសឱ្យបង្ហាញ 10, 25 ឬ 50។
ការលក់តាមអតិថិជន
បង្ហាញអតិថិជនទាំងអស់ដែលបានទិញ ឬបង្វិលទំនិញក្នុងកំឡុងពេលនោះ ដោយតម្រៀបអ្នកដែលមានការលក់សុទ្ធខ្ពស់ជាងគេនៅខាងលើ។ របាយការណ៍នេះបើកបង្ហាញទិន្នន័យ ឆ្នាំនេះ ឱ្យស្រាប់។ អ្នកអាចត្រងតាម ប្រភេទអតិថិជន នៅក្នុង តម្រង។
- វិក្កយបត្រ, ការលក់សុទ្ធ, មធ្យមភាគការលក់ និង ប្រាក់ចំណេញ រាប់តែក្នុងកំឡុងពេលដែលបានជ្រើសប៉ុណ្ណោះ។
- ទឹកប្រាក់ជំពាក់ គឺចំនួនប្រាក់ដែលអតិថិជនរូបនោះនៅជំពាក់គិតត្រឹមថ្ងៃនេះ លើវិក្កយបត្រ ទាំងអស់ របស់គាត់ រួមទាំងវិក្កយបត្រចាស់ៗពីមុនផងដែរ។
- ការលក់ចុងក្រោយ គឺជាកាលបរិច្ឆេទវិក្កយបត្រចុងក្រោយបង្អស់របស់គាត់ ទោះបីជានៅក្រៅកំឡុងពេលដែលបានជ្រើសក៏ដោយ។
ចុចលើអតិថិជនណាម្នាក់ដើម្បីពិនិត្យមើលព័ត៌មានលម្អិត។
ការលក់តាមម៉ាក និងប្រភេទទំនិញ
បង្ហាញទំនិញដែលលក់ដាច់ ដោយរៀបចំជាក្រុមតាមម៉ាក ឬចុចលើ ប្រភេទទំនិញ នៅខាងលើដើម្បីរៀបចំតាមប្រភេទទំនិញ។ អ្នកអាចត្រងតាមម៉ាក, ប្រភេទទំនិញ, អតិថិជន ឬ បុគ្គលិកលក់ នៅក្នុង តម្រង។

- បរិមាណ គឺចំនួនគ្រឿងដែលលក់ចេញ។ ចំណែក ការបង្វិលទំនិញចូល រាប់ចំនួនគ្រឿងដែលបង្វិលចូលវិញក្នុងកំឡុងពេលនោះ។
- ថ្លៃដើម គឺថ្លៃដើមនៃទំនិញដែលលក់ចេញ ដកថ្លៃដើមនៃទំនិញដែលបង្វិលចូលស្តុកវិញ (របៀបគណនាថ្លៃដើមស្តុក)។ ប្រាក់ចំណេញ គឺការលក់សុទ្ធ ដកថ្លៃដើម។ អត្រាចំណេញ % គឺប្រាក់ចំណេញធៀបនឹងការលក់សុទ្ធ។
- ទំនិញត្រូវរាប់ចូលក្នុងម៉ាក និងប្រភេទទំនិញតាមទិន្នន័យ បច្ចុប្បន្ន។ បើអ្នកប្ដូរទំនិញទៅប្រភេទផ្សេង ការលក់ពីមុនៗទាំងអស់របស់វាក៏នឹងផ្លាស់ប្ដូរទៅតាមនោះដែរ។
ឧទាហរណ៍ Anker លក់បាន 60 គ្រឿង បានប្រាក់ $1,500។ មានថ្មសាកបម្រុង (power bank) តម្លៃ $25 មួយគ្រឿងត្រូវបង្វិលចូលស្តុកវិញ ដូច្នេះការលក់សុទ្ធនៅសល់ $1,475។ ឯថ្លៃដើមនៃទំនិញដែលលក់ចេញគឺ $1,000 ដកថ្លៃដើម $16 នៃគ្រឿងដែលបង្វិលចូលវិញ គឺថ្លៃដើមនៅសល់ $984 ចំណេញបាន $491 ស្មើនឹងអត្រាចំណេញ 33.3%។
ចុចលើម៉ាកណាមួយដើម្បីមើលទំនិញក្នុងម៉ាកនោះ រួចចុច ម៉ាកទាំងអស់ ដើម្បីត្រឡប់មកវិញ។ បើមិនកំណត់តម្រងទេ តួលេខការលក់សុទ្ធនៅទីនេះនឹងដូចគ្នាបេះបិទទៅនឹងសង្ខេបការលក់សម្រាប់កាលបរិច្ឆេទដូចគ្នា។